Ek dink met trots terug aan die laaste paar jaar en oor wat ons as Brandwag familie bereik het. Hiervoor wil ek dank betoon aan die beheerliggaam van die skool, my bestuurspan, ons kringbestuurder, Mnr. Mokati (vir die leiding wat hy aan my gee), my vaardige personeel, elke leerder wat ons skool bywoon en ons hemelse Vader vir sy daaglikse seëninge.
Ons skool was geseën om hierdie jaar akademies uit te blink met alle grade wat hulle doelwitte bereik het. Hierdie is die resultaat van harde werk in die klas, en ons is trots daarop. Ons is trots op die meerderheid van ons leerders wat hulle doelwitte bereik het en is seker dat die res van die leerders dit ook sal kan doen.
Ons buitemuurs lewer uitstekende resultate. Baie leerders het gedurende die jare ons skool verteenwoordig op provinsiale en nasionale vlak in verskillende items soos Trompoppies, Rugby, Karate en Dans. Ons B-wag Beat dansgroep en ook die leerders wat deelgeneem het aan die Eisteddfod het presteer op plaaslike vlak. Ons is trots op hierdie leerders as ware ambassadeurs van ons skool.
Ons skool is hoog in aanvraag en dit kan gesien word aan die aantal aansoeke wat ons ontvang elke jaar. Ongelukkig kan ons nie al die aansoeke akkomodeer nie, maar probeer om almal te help waar ons kan. Aanvanklike getalle wys dat ons 1500 leerders akkomodeer, wat ons by die limiet van ons kapasiteit bring.
Ons infrastruktuur het aansienlik uitgebrei met die bou van die nuwe kantoorblok, personeelkamer, ablusieblokke en klaskamers. Ons het ook ons IT departement vergroot sodat ons leerders en onderwysers ‘n meer moderne ervaring kan hê.
Ons meegevoel gaan ook uit aan alle leerders, ouers en personeel wat familie gedurende hierdie moeilike tyd verloor het. Mag julle vetroosting by die Hemelse Vader vind.
Geluk aan elke leerder wat suskes behaal het. Elke een van julle is ‘n kampioen. Dankie aan elke leerder van Brandwag Primêr, vir elke groet en glimlag. Julle is die rede vir my bestaan.
Hou altyd ons skool se lese, tot diens bereid, as jou riglyn deur die lewe. Volg jou drome en laat die volgende waardes deel wees van jou lewe: respek, verantwoordelikheid, omgee, betroubaarheid, regverdigheid, geloofwaardigheid en burgerskap.
Dit is vir ons belangrik om alle eer en dank aan ons hemelse Vader te gee vir Sy genade en dat Hy ons seën met leerders en ouers wat ons in staat stel om te presteer.
Brandwag Groete
Mnr. A. Venter
